Sal Bass

Ágætu lesendur,

Veiðibjórinn verður tilkynntur fyrir helgi þó svo að margir viti nú þegar hver hann er. Þið forvitnu getið hætt að senda okkur tölvupóst.

Fyrir rúmlega ári síðan sótti maður um að ganga í Sal Bass. Hann gerði formlega beiðni þess efnis. Reglur Sal Bass kveða á um 6 mánaða reynslutíma að lágmarki en nú hefur stjórnin loks sammælst um að Ólafur Nielsen verði Sal Bass meðlimur. Ólafur Nielsen er Garðbæingur ættaður af Akranesi og af góðum ættum. Hann starfar hjá flokksblaði Sjálfstæðisflokksins. Ólafur er slyngur veiðimaður og mikill hnýtari og því gott að fá hann inn í félagið.

Hér má sjá mynd af Ólafi við veiðar á Kolluvatni

Ólafur setti í þessa bleikju en hún tók fluguna Gullfótinn sem er skemmtileg púpa sem hann hannaði sjálfur.

Þess ber að geta að það styttist í ferðir Sal Bass manna í Ásgarðinn og Flókadalinn en á síðarnefnda staðinn höfum við kíkt á einu sinni í sumar. Það var á opnunina þann 17. júni.

Nokkrar myndir úr flókunni

• Segðu þína skoðun... (Ein skoðun)

Eftirvæntingin hefur verið ótrúleg - nánast jafn mikil og þreytan útaf biðinni - og nú er komið að því. Hér er seinna hollið! Síðustu tilnefningar til veiðibjórs ársins 2008.

Slots Pilsner
Já Slots. Af hverju? Þrátt fyrir að vera kreppuheldur klúbbur þá eru Sal Bass menn tilbúnir (til að íhuga) að draga úr eyðslu þar sem slíkt er hægt. Því fær Slots þessa skammarlegu tilnefningu fyrir það eitt að vera ódýrasti bjórinn í ríkinu.
Jákvætt: Ódýr
Neikvætt: Allt annað

Moosehead
Eðallager frá elsta brugghúsi Kanada. Glæsilegt útlit flöskunnar er sérlega heillandi og fer hann vel með öllum veiðigræjum.
Jákvætt: 5% styrkur = gott jafnvægi.
Neikvætt: Fæst bara í 350ml flöskum.

Pearl River
Þessi eðaldrykkur er bruggaður af mikilli þekkingu kenndri við van í hinu þekkta bjórlandi Kína. Hann hlýtur tilnefningu fyrir að hafa “River” í nafninu og fyrir að bragðast alltaf eins; hvort sem hann er nýopnaður og ískaldur, eða búinn að fljóta opinn í heita pottinum yfir heila nóttu.
Jákvætt: Maður veit við hverju skal búast
Neikvætt: Maður getur bara búist við vondum bjór

Holsten Festbock
Þessi bjór er örlítið þyngri í magann en Sal Bass meðlimir hafa vanist í veiðiferðunum en samt ekki alveg. Festbock er ansi hátíðalegur eins og nafnið gefur til kynna en veiðiferðir eru jú ekkert síðri hátíðir en jólin. Furðulega léttur og skemmtilega flókinn karakter; hvernig er hægt að útiloka bjór með jafn skrautlega lýsingu og þessi (af vinbudin.is):”Brúnn. Góð fylling, þurr, mildur, lítil beiskja, höfugur, með smjörkenndan rúgbrauðs og lakkrískeim.”
Jákvætt: 7% styrkur, maður á eftir að sjá fleira en fiska eftir nokkrar dósir
Neikvætt: Kannski örlítið of þungur og ekki beint sumarlegur

Þá verður bara að sjá á næstu dögum, vikum, eða kannski mánuðum, hvaða bjór verður útnefndur veiðibjór ársins 2008. En endilega látið gagnrýni eða lof heyrast hér í kommentakerfinu.

• Segðu þína skoðun... (6 skoðanir)

Mér er sannur heiður að kynna fyrstu 5 bjóranna sem munu berjast um titilinn Veiðibjórinn 2008. Fyrirkomulagið verður með því sniði að við munum kynna til leiks þá sem tilnefndir eru. Lesendur mega koma með tilnefningar en þá er óskað eftir því að við hvern bjór sé komið með plúsa og mínusa fyrir því að hann verði valinn. Það eru nokkrir hlutir sem hafa þarf í huga þegar við veljum veiðibjórinn. Við erum að leita að bjór sem við ætlum að drekka við veiðarnar og því þarf hann að henta við það. Við höfum enn ekki sötrað kippu af Orval eða Chimay við árbakkann. Því þarf bjórinn að geta hentað í veiðidrykkju og vera léttur í maga og ekki of sterkum. Einnig má hann ekki vera of dýr því eins og við vitum þá eru veiðileyfin alveg nógu dýr.

Númer 1: Löwenbrau

Þetta er bjórinn sem var afar nálægt því að vera valinn í fyrra. Í fyrra var ritað Þessi sögufrægi bjór er tilvalin í veiðina. Þar sem hann er bruggaður eftir Bavarískum hefðum (skv. hreinleikalögunum frá 1516) í Munchen og er hann mjög bragðmikill og telst í hópi lagerbjóra. Helsti kostur Löwenbräu liggur í því að þrátt fyrir hans þétta og maltaða bragð, er hann mjög léttur og því hægt að drekka tiltölulega mikið af. Löwenbräu er sterkur kandídat því hann hefur hefðina í vopnabúri sínu; rekur sögu sína til 1383 og hefur verið seldur á óktóberfest síðan 1810.
Jákvætt: Topp bjór og alls ekki þungur í maga.
Neikvætt: Sama og í fyrra. Hann fæst ekki í gleri og einungis í 500ml. Hann er einungis seldur í tveim búðum og því ekki hægt að nálgast hann hjá öllum bestu ám landsins.

Númer 2: Samuel Adams

Það eru miklir fordómar gagnvart Bandarískum bjórum. Sam Adams er þó allt annar hlutur en Bud, Coors og Miller. Sam Adams er commercial útgáfan af þeim frábæru micro brewery bjórum sem finna í USA.
Jákvætt: Karamellu maltaða bragðið ætti að vera nóg til að koma honum í undanúrslit (eða hvað?) en kostirnir eru fleiri. Hann má fá í þrem útgáfum í ÁTVR. Hefðbundinn, Black Lager og Boston Ale. Hann kemur í 355ml gleri sem hæfileg stærð. Einnig fæst hann í öllum góðum vínbúðum.
Neikvætt: Sam Adams er ekki ódýr bjór. Kippan er að detta í 1440 krónum.

Númer 3: Kaldi

Kaldi er klárlega besta framtak landsbyggðarinnar til bjórgerðar hingað til. Kaldi er þess vegna vel að því kominn að vera tilnefndur til Veiðibjórsins 2008. Hann er bruggaður eftir tékkneskum sið en Sal Bass valdi einmitt tékkneskam bjór sem Veiðibjórinn 2006. Nú er spurning hvort íslensk-tékkneskur geti hampað titlinum.
Jákvætt: Gott verð miðað við gæði, fæst í gleri og er til í tveim tegundum ljós og dökkur.
Neikvætt: Það er svo sem ekkert neikvætt nema kannski fyrir dósaplebbana en þá fæst Kaldi bara í gleri.

Númer 4: Egils Premium

Ég hafði mínar efasemdir um Egils Premium. Egils að gera ,,gæða lager” ? og úr íslensku byggi ? Hann hefur þó reynst vera ágætis bjór og er góðu verði. Fæst í dós og gleri og eflaust í hverri einustu vínbúð á landinu.
Jákvætt: Gott verð, fæst víða, dós og gler, íslensk bygg.
Neikvætt: Nýja ljóta logoið hjá ölgerðinni er klárlega ekki að gera sig.

Númer 5: Bavaria

Það er eitt sem Bavaria hefur fram yfir alla hina. Hann fæst í 25cl flöskum. En það er ekki allt, hann er með skrúfutappa. Ég get samt ekki hætt að minnast á 25centilítrana. Það merkir að meðal íslendingurinn geti fengið sé 2 kalda út í ánni og samt keyrt upp í hús. Bavaria á það líka til að vera skít ódýr. En það er ekki allt heldur fæst hann í stórri dós, lítilli dós, stóru gleri og litlu gleri.
Jákvætt: Úrval, fáanleiki, verð.
Neikvætt: Hann er ekki sá besti en langt frá þvi að vera vondur.

Þetta eru fyrstu 5 sem tilnefndir eru en seinni hlutinn kemur inn á næstu vikum.

f.h. Veiðibjórnefndar Sal Bass
Jóakim

• Segðu þína skoðun... (8 skoðanir)

Eins og í byrjun síðasta árs munu Sal Bass fara yfir það helsta frá veiðivöruframleiðendum. Eftir að hafa séð það nýjasta frá Orvis er vel við hæfi að við skoðum úrvalið hjá þeim fyrir sumarið.

Orvis Pro Guide 3 vöðlur:

Sal Bass menn eru klofnir í tvo hópa þegar kemur að vöðlum. Það er annað hvort Orvis eða Simms. Sumir hafa viljað fara í Loop en fallið í yfirlið þegar þeir sjá verðin hjá Ása. Nóg um þau. Orvis hafa verið með Pro Guide 2 í nokkur ár. Pro Guide 2 eru frábærar vöðlur og níðsterkar. Það helsta sem ég hefði getað sett út á þær er að striginn er full stífur og nokkuð þungur. Það gerir þær óþæginlegri en Tailwater vöðlurnar sem Steinar á. Nýju Pro Guide 3 hafa aftur á móti léttara efni það sama og er í Tailwater. Einnig eru saumarnir innan á sem verður til þess að saumarnir munu ekki leka þó svo að fæturnir nuddist saman. Þessar verða klárlega á listanum næst þegar maður endurnýjar.

Orvis Battenkill Bar Stock:

Orvis BBS er ekki nýtt veiðihjól. En það hefur verið hingað til hræódýrt og hrikalega létt. Núna eru Orvis menn þó búnir að létta það um 20%. Þetta hjól kostar $89 í USA sem er auðvitað ekki neitt. Steinar notaði það þar til hann fékk sér Danielssen hjól og var bara nokkuð sáttur.

Orvis Zero Gravity Helios:

Orvis voru fyrir 10 árum ekki hátt skrifaðir í stöngum. Það hefur hinsvegar breyst. Síðustu 5 kynslóðir af stöngum hafa verið hver annarri betri. Zero Gravity kom út fyrir 2 árum og var þá flaggskipið frá Orvis. Hún var léttari og sterkari heldur en flest annað á markaðnum. Róbert á ZG og er alsæll. Helios er það nýjasta. Hún er skv. Orvis ,,The new Helios is so innovative and, frankly, so far ahead of all other fly rods it skips generations in how a fly rod should feel, cast, and fish. It is so sublimely light, incredibly responsive, deadly accurate”. Ég tók texta framleiðandans þó með fyrirvara. En eftir að hafa lesið spjallborð á netinu sér maður að menn halda varla vatni yfir þessum grip.

Það er nóg í viðbót í listanum en þessir þrír gripir fannst mér standa upp úr. Við eigum klárlega eftir að heimta prufustöng af Heliosnum til að prófa og skrifa review hér inni. Annars erum við að fara yfir nýjustu vörum frá öðrum framleiðendum og því kemur önnur grein von bráðar.

bk,
Jóakim

• Segðu þína skoðun... (Engar skoðanir)

Gleðilegt ár félagar,

Það er orðið langt síðan Sal Bass menn skrifuðu hér inn og því ekki seinna vænna en að fara að hita upp bloggið. Í vændum er gott veiðisumar. Það er frá skemmstu að segja að hnýtingardeildin hefur staðið í ströngu í vetur. Pétur hefur setið sveittur og kominn með 500 flugur tilbúnar. Steinar er kominn heim frá Bretlandi þar sem hann heimsótti Sal Bass UK og mun sennilega henda inn sögum frá þeirri ferð bráðlega.

Það fer að styttast í vorið og menn vita hvað það þýðir. Veiðibjórinn 2008 verður bráðum valinn. Tilnefningar verða þó með öðru sniði og munu almennir lesendur geta haft áhrif á valið. Spennandi það. En Veiðibjórinn verður valinn í fyrstu vikunni í apríl eins og í fyrra þannig að tilnefningar og undanúrslit munu vera í lok febrúar / byrjun mars.

kv.
Stjórnin

• Segðu þína skoðun... (Engar skoðanir)

Annað tölublað stafræna veiðitímaritið This is Fly kom nú nýlega út og er feitara en nokkur hefði trúað - yfir 90 opnur af greinum, ljósmyndum, myndböndum, græjuskoðun og fleiru.

Skoðið hér.

• Segðu þína skoðun... (Engar skoðanir)

Sælir lesendur,

Þótt laxveiðisumarið sé dapurt heyrum við Sal Bass menn góðar fréttir af silungsveiði félagsmanna. Mikið af þessari góðu veiði er að finna á Arnavatnsheiði og svo Skagaheiði. Tveir stjórnarmeðlimir fóru í boði Þorsteins góðfélaga til veiða á Kolluvatn á Skaga. Veðrið var svipað gott og brandarar starfsmanna veiðideildar Intersport. Þeas. skítakuldi, rok og þoka. Það stöðvaði þó ekki veiðina og veiddust á fjórða tug bleikja á einum og hálfum degi. Mest veiddist á tilraunaflugu sem ekki verður uppljóstruð að þessu sinni. En hún hefur verið í þróun frá því í vetur hjá hnýtingardeild Sal Bass. Þessi fluga tók 19 af þessum bleikjum.

Pétur fór svo á sama tíma í Eystri Rangá þar sem veiðin var dapurleg en þó náði hann einum 6 pundara á Black Sheep túpu. Myndirnar frá Kolluvatni eru komnar hingað

• Segðu þína skoðun... (Engar skoðanir)

Áttu börn með athyglisbrest sem gera þig brjálaðann í fjölskyldutúrunum. Geta þau ekki stoppað að væla og hoppa í eina helvítis mínútu við árbakkann vegna þess að þau hafa ekki sjónvarp eða tölvuleiki til að djöflast í. Engar áhyggjur! Lausnin er fundin kæra foreldri. Hentu einni skotflaugaveiðistöng í krakkaskarann og þau munu rífast þar til þau sofna um hvort þeirra fái að skotflauga eitt stykki silung. Lítið vita þau að þetta drasl gæti ekki veitt frekar en tannbursti á spotta.

Rocket Fishing Rod

• Segðu þína skoðun... (Ein skoðun)

Nú um helgina verður nóg að gera hjá Sal Bass mönnum. Pétur er á leið í Eystri Rangá þar sem hann vonast eftir að laga veiðitölurnar í Rangánni fyrir þetta sumarið. Hinir meðlimir stjórnar ætla aftur á móti að daðra við silungin á Skagaheiði og er ferðinni heitið í Kolluvatn. Stjórnin fór í Veiðibúðina við Lækinn í vikunni til að byrgja sig upp fyrir þennan túr. Bjössi í Veiðibúðinni lumaði að sjálfsögðu á leynivopnum og brögðum sem vænleg eru til árangurs.
Með í túrnum verða ýmsar græjur sem líklega verða prufaðar og reviewaðar fyrir síðuna.

Meira um þennan túr eftir helgi. Að neðan má sjá mynd af stjórninni frá Þingvöllum sem tekin var í síðustu viku af Eysteini Jónassyni ljósmyndara. Eysteinn fór á fluguhnýtinganámskeið hjá Pétri og bar því góða söguna.

• Segðu þína skoðun... (Engar skoðanir)